الجمعة، سبتمبر ٢٣، ٢٠٠٥

لك






هذا اهداء للعزيزة ايا
لك أنا شلت القلب.... و رميته
بكامل قواي..... تحت رجلك حطيته
و قلت يا قلبي.... اسمعني.إن داسك..... بكيفه
و إن شالك من الارض و باسك..... بكيفه
حبيبتي هذا القلب..... تحت أمرك مشيته
تحضنينه و إلا تبعدينه...... تراني بالبدايه ق
طيته

الجمعة، سبتمبر ١٦، ٢٠٠٥

سناء وحكم القدر



سناء قصتها قصة مع شاب كويتي اسمه صلاح، في يوم كان
أخونا صلاح قاعد بالبيت ماله خلق يطلع كعادته يقلب قنوات التلفزيون و فجأة يدق التلفون وكانت هذه البداية
صلاح : ألو
؟ : ألو مرحبا
صلاح : مرحبتين
؟ : لو سمحت ممكن أكلم أمل
صلاح : لا والله مع الأسف , الظاهر إنك غلطانة بالنمرة
؟ : أوكي أنا آسفة, باي
صلاح : الله معاك , باي
صلاح : إيه والله عليه صوت, يعور القلب, جان زين أدق مرة ثانية
ويدق التلفون مرة ثانية
صلاح : ألو
حمد : ها بوصلوح التلفون مشغول جنك منهم
صلاح : حمد أسكت , من شوي دقت علي وحدة صوتها يعور القلب
حمد : طول عمرك رهيف, خلك ريال, بتيي معانا القهوة
صلاح : لا مالي خلق
حمد : مالك خلق والا
صلاح : لا والله بس تعبان, وأنت تدري إني الخميس أداوم, اعذرني ما أقدر
حمد : الله يعينك, علي العموم إذا غيرت رأيك دق علينا
صلاح : ماشي
حمد: باي
صلاح: باي
إيه , ودك تدق مرة ثانية, الله وضبط معاها, فعلا راح أكون محظوظ
ويدق التلفون, ويشيله صلاح بسرعة ألو
؟ : ألو سلام بابا
صلاح : منو
؟ : في ميري , شوية بابا
صلاح : لا ماكو ميري , لا تدقين مرة ثانية
؟ : زين باي
صلاح : باي
وقته ميري بعد, والله فرق, ويدق التلفون, ويشيله صلاح بعصبيه, نعم
صمت !!!
صلاح : ألو ألو, يتسكر الخط
أفا, هذي تاليته, ويدق التلفون مره ثانيه, صلاح : أحلوت جنه, ألو
؟ : ما عليه, أذيتك اشوي
صلاح : لا عادي بالعكس
؟ : بس حبيت أسأل, هذا تلفونكم من زمان ولا توكم مطلعينه
صلاح : لا والله, بايقين الخط من اليران, خبرك كنه أول, نستعمل حمام زاجل ومكاتيب
؟ : أه, لا مو قصدي جذي، آسفة
صلاح : تري أضحك معاك, لا تاخذينها جد
؟ : أشوه, ضيقت خلقي
ص: صج ضاق خلقك
؟ : أكيد, ما حب أضايق أحد
صلاح : بس أنتي ما ضايقتيني, وأبي أطلبك طلب
؟ : آمر
صلاح: أبيك كل ما ضاق خلقك, اتدقين علي, أوكي
؟: سكون
صلاح : شفيك, صعب عليك الطلب
؟: مادري شقولك, انه عمري ما كلمت واحد بالتلفون
صلاح: بس الحين كلمتيني, اسمي صلاح, وما حب الجذب بالأسامي, ولا في أي شي ثاني, وحضرتك
؟: وانه سناء, والجذاب يا أخ صلاح, ما احترمه أصلا, وعاشت الأسامي
صلاح: الله يخليج ويسلمك, ماقلتيلي, تشتغلين ولا تدرسين
سناء : لا هذا ولا هذا, خلصت الثانوية وقاعدة بطاليه
صلاح: بس غلط جذي, شنو أنتي ما عندك هدف بالحياة
سكون
صلاح : الو
سناء: لا أكيد عندي, انه أفكر ادرس بره
صلاح : وين يعني
سناء :لندن, أمريكا, ناطرة قبولي
صلاح : يعني قدمتي أوراقك
سناء : أكيد
صلاح :عيل شلون تقضين فراقك, طلعات ولا رياضه
سناء :لا والله انه مو زود مع الطلعات, وما عندي ربع وايد, بس بنت عمي, وأحب الموسيقى والقراءة
صلاح :أي, تسمعين بس
سناء :اسمع واعزف
صلاح :حلو, بس شتعزفين
سناء :بيانو
صلاح :الله, تصدقين, من أول ما سمعت صوتك, قلت انك إنسانه كلاس, ودي اسمع عزفك ممكن
سناء :ممكن, بس انه مطره امشي, أخاف أمي تيي الحين أسفه
صلاح :علي راحتك
سناء :من رخصتك الحين, باي
صلاح :بس متي راح تكلميني باجر
سناء :مادري والله, أنت متي أتكون موجود
صلاح : اخذي موبايلي
سناء :والله شقولك, موبايل, صعبه شوي
صلاح :طيب, متي يناسبك عيل
سناء : المغربيات, من الست إلي الثمان, هالمحاري
صلاح :راح أكون ناطرك ترى
سناء :انشالله, اقدر امشي
صلاح : بحفظ الله
سناء : باي
صلاح : باي
أي, هذي وحده تسو الواحد يتعذب علشانه, مبين عليها بنت ناس, خندق علي حميد
حمد : الو
صلاح : حمد أخوك طاح ومحد سمي عليه
حمد : افا ,عسي ماشر
صلاح : شفت الي قتلك عنها
حمد : شفيها
صلاح : دقت علي مره ثانيه
حمد : والله عبالي عندك سالفة, خرعتني ويا ويهك
صلاح : حمد, تدري شنو البنت اكلاس, شنو مؤدبه, تعور القلب
حمد : سلامة قلبك, كلهم جذي بالبداية, تعال بس القهوة خل نضحك عليك, يا خفيف
صلاح : الشره مو عليك, صدقيني حمد هذي شي خيالي, ش نومني ألليله
حمد : عيل تعال عندنا
صلاح : انه وين ونت وين
حمد : صلاح لا تأذينا, يا جماعه صاحبنا صاير روميو
صلاح : حمد عن الفضايح ,الشره علي إني قتلك
حمد : بتي تعال لاتاذينا
صلاح : لا بنام
حمد : توك تقول ما تقدر تنام, علينا
صلاح : لا والله تعبان, باي
حمد : باي يا سي روميو
صلاح : باي حمد ,عن الفضايح الله أخليك
انه صج ملقوف, ما لقيت إلا هذا اسولفله, صج غبي ,إيه يا سناء, يا تري شلون صايره, لازم أسأل باجر
اليوم التالي, صاحبنا ناطر, لاحس ولا خبر, يقلب بالتلفزيون ألين غفت عينه, ويدق التلفون, الو
؟: الو في ميري
صلاح : قتلك مافي ميري , وان دقيتي مره ثانيه, يا ويلك, باي
أذتنا هاذي
ناطر صلاح يم التلفون, ولا حس ولا خبر, لين غفت عينه حتى اليوم التالي, وهم ناطر عند التلفون, يدق التلفون, الو
سناء : الو صلاح
صلاح: هلا والله , وينك أمس
سناء : سوري, أمس ما قدرت اتصل, كان عندنا ناس
صلاح : وأكيد, أنتي إلي اتظبطين وتسوين
سكون
صلاح : الو
سناء : الو
صلاح : شفيج
سناء : لا ماكو شي
صلاح : ما جاوبتيني
سناء : علي شنو
صلاح : لا, أنتي مو معاي, أقولك أكيد قمتي بالواجب
سناء : اه, طبعا, صلاح
صلاح : يعيون صلاح
سناء : اه, تسلم عيونك
سكون
صلاح : آمري
سناء : مايامر عليك عدو, تصدق انه وايد مرتاحتلك , أحسك ادمي
صلاح : كلك ذوق, وأنتي بعد, من أول ماكلمتيني, كان ايني إحساس غريب, مادري شنو
سناء : مثل شنو صلاح
صلاح : مادري, أحس مثل ما عرفتك بسهوله,أخاف أفقدك بنفس السهولة
سناء : لا صلاح, لاتقول جذي, الله لا ييب فراق
صلاح : أي والله سناء, تدرين شودي
سناء : شودك, شوقتني
صلاح : ودي أشوفك
سناء : بس, منت ملا حظ, انه تو الناس
صلاح : ملا حظ, ومابي اضغط عليك, وبيها تيي منك, وحطي بالك, انه مو مثل الشباب إلي يلعبون, وماني ياهل
سناء : لا محشوم, علي فكره, ممكن اعرف جم عمرك
صلاح : انه
سناء : إذا ما يضايقك
صلاح : لا عادي, عمري 25 سنه
سناء : العمر كله
صلاح : تسلمين
سناء : صلاح
صلاح : هلا
سناء : ما ودك تسمعني وانه اعزف علي البيانو
صلاح : بلا
يدق تلفون صلاح
سناء : رد علي تلفونك
صلاح : لا خليه أولي ,هذا واحد من الربع, مليق وهذار ومالي خلقه
سناء : علي راحتك, شتحب تسمع
صلاح : أي شي تحبينه
سناء: انه أحب السمفونيات ,عادي
صلاح : أي عادي, كل شي منك حلو
سناء: مشكور, اسمع عيل
وقامت تعزف
سناء: ها, شرايك
صلاح : شي عجيب, الله لا يحرمنا
سناء : آمين, صلاح لازم امشي الحين
صلاح : اوكي, بس إذا بتكشتين فيني مثل أمس, عطيني خبر الله أخليك
سناء : انه آسفة, والله غصبا علي, بس ولا أهمك أنت تامر, باي الحين
صلاح : باي
إيه الظاهر إني حبيتها, ويدق التلفون ,الو
حمد : وينك أنت, ليش ما ترد
صلاح : أذيتنا ,كنت مشغول ياخي
حمد : مشغول, صار لك يومين ما شفناك, الظاهر صاحبنا عاشق
صلاح : لا والله, بس مالي خلق
حمد : ما تبي تطلع أتغير جو
صلاح : لا والله اعذرني حمد, مو نايم, وباجر دوام, أنت تدري
حمد : اوكي, خل أشوف واحد غيرك, أنت ما منك فايدة, اوكي باي يا حلو
صلاح : باي حبيبي
متفرغ هذا مع الويه, انه وين وهذا وين, ومرت شهور عديدة,
وصلاح علي نفس الحال, كله قاعد بالبيت, وينطر سناء, وبعد ست شهور علي نفس الحال,
قرر صلاح ان يصر علي رؤية سناء, ويدق التلفون, الو
سناء : هلا صلاح, شخبارك
صلاح : إيه, أخباري, أخباري مو زينه
سناء : ليش, شفيك
صلاح : سناء
سناء : هلا
صلاح : اشرايك فيني
سناء : ليش هالسؤال
صلاح : جاوبيني
سناء : خوش ريال
صلاح : بس مو مبين
سناء : شتقصد, ما فهمت
صلاح : إلي اقصده, تثقين فيني
سناء : أكيد
صلاح : يمكن
سناء : ليش
صلاح : مادري
سناء : صلاح, شفيك اليوم, مو طبيعي
صلاح : انا إلي مو طبيعي
سكون
سناء : اظاهر انك مليت مني, تبيني اسكر الخط
صلاح : لا انا مليت من عدم الثقة, وانه قتلك بالبداية وأول ما عرفتك, انا ما حب الجذب واللعب, انه ماني يا هل
سناء : العفو, ليش تقول جذي
صلاح : مادري عنك, صار لنا شكثر مع بعض لما الحين مو واثقة فيني,
ولا حضي إني, مخلي ربعي وأهلي وشغلي, كله علي شانك, وأنتي مو حاسة , شي يبط الجبد
سكون
صلاح : الو
سناء : معاك
صلاح : انه بوادي, وانتي بوادي, حسي فيني اشوي الله يخليك
سكون
ويحس صلاح بالبكاء
صلاح : أشفيك, انه شقايلج
سكون
صلاح : الو
سناء : صلاح, بصراحة أنت خوش ريال, بس صدقني في شي يمنعني, مابي أقوله ولا أذكره حتى
صلاح :مبين, اظاهر احنه مو ثقة
سناء : أنت ليش تقول جذي, حرام عليك, والله ما قدر
صلاح : أكيد ما تقدرين, لأني انه اللعبة إلي تلعبين فيها, متى ما كنتي فاظيه دقيتي, وإذا مشغولة بالعنة, ما يهمك
سناء : الله أسامحك, أنت ما تدري شفيني, معذور
صلاح : أي شفيك
سناء : صلاح, انه مشلولة, استانست الحين
صلاح : مشلولة
سناء : أي مشلولة, هذا إلي تبي تعرفه
سكون
صلاح : سناء انه ما يهمني, ولاني قايلك انا آسف, والله كنت مادري,
مثل كلام المسلسلات, وانه رضيت فيج بحلوك ومرك, سواء كنتي مشلولة,
ولا مو مشلولة,
هذا ما راح يغير بالموضوع شي,مفهوم
سكون
صلاح : تسمعيني
سناء : أسمعك, صلاح ممكن امشي الحين
صلاح : ليش بالله
سناء : تعبانه اشوي
صلاح : سلامتك, انشالله فيني ولا فيك
سناء : لا, سمله عليك,لا تقول جذي
صلاح : الله , تخافين علي
سناء : أكيد
صلاح : توعديني أني أشوفك
سناء : انشالله
صلاح : متى
سناء : باسرع وقت
صلاح : وعد
سناء : وعد, باي الحين
صلاح : باي
والله حاله, ش ها لحظ, والله حظي ردي, أي بس جان زين توافق أني أشوفها,
ومر أسبوع وما دقت, وصاحبنا حيران, ويدق التلفون الو
سناء : ما فقدتني
صلاح : والله ما فيك خير, وينك طول ها لمده, خرعتيني عليج
سناء : كنت قاعدة اخطط
صلاح : الله يستر, عسي مو بوقة بنك
سناء : صلاح, أنت كله تتطنز علي, هذي يزاتي أني اخطط شوفتنا
صلاح : حلفي
سناء : أي والله
صلاح : يا بعد روحي والله
سناء : سلامة روحك
شوف, اتفقت انه وبنت عمي, أنها توصليني لما فندق الرجنسي,
في عندهم مطعم تحت,انطرك أهناك, بس لا زم يكون شوي مبجر,
لأني ما قدر اتاخر, وبنت عمي تبي تتعرف عليك بعد, عادي
صلاح : أي عادي, ما عندي أي مشكلة, بس أني أكون معاج, و الباجي ما يهمني, بس اشلون أعرفك
سناء : هو , اشفيك, انا علي ويل جير, أبين من كرسي, لا تخاف
صلاح : أه, صج أني غبي, اوكي
سناء : لا محشوم , مستا نس
صلاح : وايد , طاير من الفرحة
سناء : أنزين, روح نام الحين, وعدنا باجر, الساعه سبع
صلاح : شنومني الحين
سناء : لا, نام وريح ,عشان ما تنام علينا بالعشا, وأبي موبايلك عشان أدق عليك إذا تأخرت
صلاح : اتتاخر, أتلاقيني قبلك
سناء : اوكي صلاح انشوفك باجر تصبح علي خير
صلاح : وانتي من اهله ومشكورة علي ثقتك فيني وان شالله أكون قدها
سناء : قدها انشاله , باي
صلاح : الله معاك
ماني مصدق أخيرا وافقت طلعت روحي بس ما سألتها حلو ولا لا ,
وقتها الحين، طلعت روحي على ما وافقت، ياعمي، المهم أشوفها والباجي يصير خير
وفي اليوم التالي وصلاح قاعد بالمكتب يدق التلفون الو
سامي : ها وينك أنت
صلاح : بهدنيا
سامي : تروح النادي اليوم
صلاح : لا مشغول مع الشغل بالليل
سامي : شغل بالليل اليوم خميس
صلاح : شنسوي بعد
سامي : والشاليه لاتقولي ماقدر بعد
صلاح : أحاول إذا خلصت مبجر مريت
سامي : لا أنت فيك شي, تري حدك متغير
صلاح : لا, بس شوي مشغول
سامي : علي راحتك باي
صلاح : باي
ويدق التلفون ورقم غريب ها منو هذا الو
سناء : صباح الخير
صلاح : يا صباح الورد , أحلا صباح والله
سناء : شوف, مو تسو يلي جذي اليوم بالعشا, تقعد أتغازلني, تري استحي
صلاح : انه ليلحين ما غازلتك, بعد ما شفتي شي
سناء : الله يستر
صلاح : من شنو
سناء : مادري شلون راح أكون جدامك, مترددة
صلاح : شوفي عاد ,عن المصاخه, ما صدقنا علي الله تين
سناء : بتشوفني لا تخاف, تبيني اقعدك المغرب
صلاح : إذا سمحتي
سناء : اوكي باي الحين
صلاح : باي
ويطلع صلاح من الدوام طاير لما البيت وجهز يلبس ,
أي البس بنطلون أي لون, لا لازم أروح رسمي, هذي بتييب بنت عمها, فشله,
ويضل قاعد طول الوقت, ويدق التلفون ,الو
سناء : هلا صلاح, يا لله قوم
صلاح : قاعد انا, أصلا ما نمت
سناء : ليش بالله
صلاح : مادري
سناء : عفيه صلاح, تري مافي وقت, بسبقك انا أهناك ,اوكي
صلاح : اوكي
سناء : باي
صلاح : باي
ويبدل صلاح بسرعة, وطير بسيارته للمكان بسرعة ,
إيه أول مره أحس بالخوف جذي, بحياتي ما كنت مرتبك جذي,
وقبل لا يوصل يدق التلفون, أو شيبي هذا, مالي خلقه, وقته الحين, ماني راد عليه,
ويدق التلفون مره ثانيه, الو
سناء : ها صلاح, وينك
صلاح : انه بالموقف, قاعد اصفط
سناء : ويه صلاح, ليش ماعطيتهم الفاليه باركنك
صلاح : ماحب الشحاطه, و من كثر ماني ملهوف على شوفتك, قمت اخو ره
سناء : أه , يا لله تعال ناطرينك
صلاح : مستحيه منها؟
سناء : مطول
صلاح : ها ها ها, لا قاعد امشي, وصلت عند الباب, بس أحس انه المسافة, وايد صارت بعيده
سناء : أه, اوكي, ناطرينك, باي
صلاح : لحظة, خلك معاي علي الخط لين أدش, ترى اشوي مرتبك
سناء : اوكي
ويمش بسرعة, ودش المطعم, وينك
سناء : هذا انته, إلي توك داش
صلاح : أي وينك
سناء : طالع علي اليمين, شوف أيدي, كاني, شفتني
صلاح : أي, باي
ويمشي صلاح, ويحس إن ريله مو شايلته, ويقرب من الطاولة, وسناء قاعدة أتطالعه, والفرحة مو شايلتها,
يالله شنو ها لجمال, حرام والله, الله يستر, بنت العم شكلها نسره, ما علينا, مساء الخير
سناء : هلا تفضل, صلاح ,هذي حنين بنت عمي
صلاح بابتسامه : هلا حنين
حنين: هلا فيك
سكون
صلاح : تحبين ناخذ البوفيه, ولا طلب
سناء : كيفك ,على راحتك
صلاح : يا لله عيل خنروح, تفظلي حنين
حنين : انه أيبلك علي ذوقي
سناء : لا تكثرين
وروح يم البوفيه, والله أني غبي, اشلون طلبت البوفيه, هذي ما تمشي, والله أني غبي, شهالفشله , أكيد تعذرني,
اخذ صحن, وبنت العم مجا بلته, شفيها أتخزني جذي, ماني مرتاح لها, ويرجع قبلها للطاولة,
ها شخبارك
سناء : تمام, ماخذت شي, شنو رجيم
صلاح : تقدرين تقولين, ما بغينا أنشوفك, شفتي انه سهله, وشفتي اشلون أنتي مرتاحة,
و جنك شايفتني, أكثر من مره
سناء : أي والله
صلاح : تدرين
سناء : شنو
صلاح : ماهقيت انج حلوه جذي
سناء : أه, صلاح بس الله يخليك, حنين يت
حنين : هاج, شتبين تشربين
سناء : لا مشكورة, بس ماي
سكون
أي, العشا وايد حلو, بس لو ما هالدعله قاعدة, الواحد يبي يسولف مو قادر, ومللتني واهي اتطالع,
وهذي الله يهديها, معطيته ويه, وكاشته فيني,
وبعد فتره , حنين أطلبت الحساب, و بدون ما تسألني إذا أبي شي, صج مليقه,
المهم يابو الحساب, ورفضت انهم يدفعون واصريت, وقلت مرة ثانية عليكم,
قالت حنين ,لا ما في مرة ثانية, هالمرة وبس, قلت خلوها علي، علشان تذكروني علي الأقل, ويدق حمد, ويحقره,
جنه ما في احد غير, يكلمه بها لدنيه, ولا حظ حنين تناغز علي كثر ما دق حمد,
المهم وقفنه أنودع بعض, سناء سلمت بيدها, وحنين ماودها أتمد أيدها ,أحس أنها كارهتني, مادري ليش ,
المهم مشيت قبلهم, قمت اخوره, باطه جبدي الي اسمها حنين, وايد شايفه حالها ,
ركبت السيارة, ينتابني شعور غريب , متضايق وبنفس الوقت مستانس,
المهم انطر تلفونها, وصلت البيت, ولا تدق سناء
صلاح : الو
سناء : هلا صلاح , مشكور علي الييه اليوم
صلاح : شدعوه, ماسوينه شي
سناء : لا والله, وايد استانسنا وياك, حتى قلت حق حنين, ماقلتلك, انه خوش ريال, وسنع
صلاح : وش قالت
وتنرفع سماعة التلفون الو الو الو
سناء : نعم يمه
الام : سناء , منو هذا الي اتكلمينه
سناء : لا يمه, هذي رفيجتي
الام : هو, تجذبين بعد, صوت ريال
سناء : لا والله يمه رفيجتي, عفيه صكيه
الام : ورفيجتك شفيها ماتحجي, طرمه
سناء : يما, صكيه
وتسكر الام , وتي طايره للبنت, لما غرفتها
سناء : صلاح , يالله باي
وتسكر الخط
والله حاله, شهالوهقه, الحين ماطاحت علينه, الا يوم شفتها, مقرود,
وبعد ساعة, والا يدق التلفون, الو
الأم : الو, أنت ما تعلمني شتبي بنتي
صلاح : لا خالتي, مابي شي
الأم : تخلخلت اورودق, يا جليل الحيا, انت ماعندك خوات
صلاح : امبله خالتي
الام : ترضى علي خواتك
صلاح : لا خالتي
الأم : يوم انك ما ترضي علي خواتك ,احترم نفسك, وان سمعت, انك رافع السماعة عليها,
تري ماتلوم الا نفسك, فاهم
صلاح : انشاله, بس خليني اشرحلك اشوي
الام : شتشرح, اظنك تعرف اهي من بنته, لا تدخل نفسك في مشاكل, انت منت قدها
وتسكر الخط
اوخ والله الام قشره,الظاهر القشاره وارثينه وراثة, أي,الحظ عسم, وين ما طقها عويه , ألاقيها من الأم,
ولا بنت العم, مس دعاله, ولا من هالافقيره المعوقة, خنشوف باجر شيصير,
مسكين صلاح, مانام مو من الخوف, كان خايف علي البنت, شنو مصيرها ,الله اعينها, وأذن الفجر صلى الفجر,
ودعي ربه, انه يرفق فيها, وراح ينام, والصبح دشت ام صلاح, قعدته لصلاة الجمعة,
صلاح, قوم يمه, قوم حبيبي صل اليمعه, قوم يوليدي, جود الله يوفقك
صلاح : انشالله يمه
ايه ليش ماقولها إني بتزوجها, أي بس شقول, بتزوج مشلولة, بروح ما فيها شده, يعدلها ربك ,
راح صلاح المسجد, قبل لايدش ولا سناء داقه
الو
الام : الو
صلاح : هلا خالتي
الام : انت ليش سويت فينا جذي
صلاح : شوفي خالتي, انه بدش المسجد الحين, وبعدين أكلمك
الام : عشتو, تصلي بعد, يالله ناطرتك
وتسكر الخط
الحقيقة إنها ما تستحي على ويها, يصير خير بعد شوي ,
وبعد الصلاة يتصل الو
الأم : الو
صلاح : شوفي خالتي , من أمس وأنا متحملك, لازم اتعرفين إني ما خاف من أحد, والدنيا طاقها بنعال
تحاول الأم تقاطعه, ويسكتها بصوت عالي , لازم تعرفين إني أحبها, وأبي أتزوجها
تحاول تقاطعه, بس إهيا حالتها
صلاح : ادري انها مشلوله ومايهمني
وتقاطعه الأم : إنت ما يهمك, بس اهلك والناس يهمهم, وانه ماعندي استعداد, ان بنتي تصير علج بحلوجهم
صلاح : والله أي واحد يتكل عليها, اشق حلجه
الأم : شوف ياوليدي, انا سمعت, بانك ريال شهم ولاحظت انك تخاف الله, لا تلعب مشاعر بنيتي
صلاح : صدقيني بدش من الباب
الأم : يمه لا تحرجني, البنت محتاجه رعايه, أربعة وعشرين ساعة, صدقني ما تقدر
صلاح : جربيني
الأم : ما في داعي, توعدني اتوخر عن البنت
صلاح : والله مادري شقولج
الام : صلاح, يمه لا تخليني أغير فكرتي فيك, توعدني
صلاح : أوعدك
الأم : مشكور ياوليدي, وانشالله الله يوفقك بوحدة أحسن منها, قول آمين
سكون
الام : قول آمين
صلاح : آمين
الأم : مع السلامة يمه
صلاح : بحفظ الله خالتي
سكرت الأم الخط, وسكرت باب الأمل معاها وقفلته, ومر أسبوع, لا حس ولا خبر , حاول يدق علي الموبايل,
مفصول عن الخدمة, اوخ غيرت خطها, لازم أدق علي البيت, ويدق علي البيت, الرقم متغير, ايه والله,
الأم جاسيه ليش سوت جذي, ليش هاللعانه, وطاف شهر والثاني, وهي لا حس ولا خبر,
أي ,أكيد ما تحبني, لو تحبني جان سوت المستحيل عشاني, اشو اني ماقلت للوالدة وأذيتها معاي,
ودار الزمن, ومرت تسع سنين علي السالفة
وسناء حتى ما اسألت











الجمعة، سبتمبر ٠٩، ٢٠٠٥

شرح اشعار 2003

يسألوني
------------------
يسألوني عن إلي جرالي
قلت صابني سهم الحب ومحد درا بي
قالوا أوصفها بزمننا الحالي
قلت مالها وصف إلا إلي يدور ببالي
قالو تحبها ........................؟
قلت حبها ما ينطق بالفم وأصبح فوق الخيالي
قالوا وصوتها ....................؟
قلت إذا ما سمعته الله يعلم بحالي
قالو ولونها .......................؟
قلت لونها حنطي ما به بالعالم ثاني
قالوا وين أراضيها ..............؟
قلت ساكنة جدة ويريتها إقبالي
قالوا تحبك ........................؟
قلت حبها يشهد عليه قلبي وسهر الليالي


جميل أن يكون بينك وبين أي شخص عزيز مسافة والمسافات كفيلة بأن تزيد الشوق أو تبعده, وبطلة هذه القصيدة من المملكة العربية السعودية، صديقة عزيزة على قلبي، ولها دور كبير في رسم هذه الكلمة وأهديها هذه الأبيات
بحر الغرام

سبحت ببحر غرامك ماهقيت أنه غويط
أمدلك يمناي تصد عني لقيت نفسي غريق
مشيت علي يالك وأتابع خطواتك
بكل خطوة أرميلك صورة وردة
أعزي فيهم كل ما ورد بأفكارك
وبنهاية الطريق اطلعت روحي
حمامة سلام حطة علي در يشه دارك
تحملك رسالة غرام مضمونها
أنا الماضي إلي كان وتوقعت بسمي فلان بن فلان
حبيبتي أنا صدري قدير مليان شوق وحنين
وفية حب دفين
وقلبي المسكين جرحته بسكين
وفاض منة الدمع وذبحة الأنين

بحر الغرام في يوم من الأيام تخيلت بأنني سابح في بحر الغرام تصفعني أمواجه وهذه النتيجة, خاطره خفيفة من محض الخيال


بخده علامة
--------------
تلا هفت عيوني عشانه
جميل واسمر وبخده علامة
طوله يعجبني عودة عود خيزرانه
مشيت وراه وقلبي طلع من مكانة
تخالفت اخطاي وسكرت بريحة دلالة
رجف كل ما فيني وصوتي تقطعت أحباله
ودي أغازلة بس أخاف قلبه مع غيري يا أسامة

بعض الأحيان يكون الواحد ماشي بأمانة الله فكرة توديه وفكرة تجيبه, ثم يصطدم بحائط الإعجاب , والطامة الكبرى إذا كان الشخص لا يستطيع أن يوصل إعجابه بداعي الخجل, فكانت هذه النتيجة


نضرة عجب


قصتي بدت بنظرة عجب
ثم صار بقلبي شوق ورعد
نافست مع ناس من جيل صعب
فيهم حقد وفيهم حسد !!!!!!!!
ثم وصلت إلي باب من أحب
حسيت بدينة وبعيونه نضرة عتب
مقدر أوضح أكثر من ما أنكتب
الحب ينولد من غير أي سبب
ترجمت كلامه لقيت فيه لحن عذب
ظليت في حيرة وعودي أنسلب
وبنهاية قصتي شفت إن العذاب مكتسب

من الصعب أن تكون المنافسة بين شخصين وأنت الثالث على هدف واحد , والأصعب أن تكون متردد في رمي سهام الحب


أحب الليل


أحب الليل وأحب القمر ه
وأحب السمي ونجومها المنتثرة
وأحب الأرض وأحب الخضرة
وأحب صدي صوتك بنبرة منكسرة
أحب خط الكحل بعيونك وبشرتك السمر ه
وأحب حتى أناقتك يوم كنه بذيك السهرة
حبيبتي بعدك دنيتي أصبحت حمرة
ورودي ذبلت واقصانها أصبحه صفرة
مافي بالي الاخط الكحل بعيونك والبشرة السمر ه

كثير من الناس سألني من هي المعنية بهذا الكلام , وأحب أن أجاوب بكل بساطة هي من محض الخيال لا داست رجلها أرضكم, ولكن شفتها بالمنام



مسكين يا قلبي
------------------------

مسكين يا قلبي قلبك ياما طرقت بيبان مسدودة

وحدة تفكلك باب وحدة تصك باب وأعصابي محروقة

ياما جلست لحالي وفكر بحالي وقول وين هي المحبوبة

شاب راسي ونحل جسمي والحب يا ناس هذي هي دروبه

يتيم ما لقيت العطف ونضراتي يا بنت حوي قدت محسوبة

هذا قلبي ما تغير مثل ماعوتيه تجرحيه ولا تفكرين داويه

أنا معاك مثل لعبة وطفل لين مليته بقسوة رميتيه وكسرتيه

أذبلت أورود حبي وقلبي كفنته وبليا رحمة بها لقبر دفنته

واسمك إلي كتبته علي صدري أشعرة إن ضايقني شلعته

كما أني خجول في العلاقات العاطفية , ولكنني عزيز النفس كذلك , والمعنى واضح في الأبيات

شرح اشعار 2004


يا ناعم العود

----------------------


ابتسام يا وردة تتمايل بين الورود
ويا شمعة ضوت حياتي وهل الوجود

يا أغنية عجز أيغنيها حتى وتر العود
اسمك{ موجة} بحر الغرام موجود

وطيفك بالسما داعب خيالي الموعود
من صفاتك الطيب والطيب فيك مشهود

فيك الكرم والكرم فيك ماله أي أحدود
حتى أشعاري تغار من عيونك السود

شوصف فيك وشخلي يا ناعم العود
ما أقول إلا ربي يحفضك من كل حسود

أهدي هذه الأبيات إلى ابتسام التي لها الفضل الكبير في مساعدتي في نشر كل ما ورد في هذه الصفحة والمجهود الكبير التي تبذله معاي دون تعب وتشجيع مستمر فشكرا لبتسام



الهجر
----------


بعد هجرك خذاني الشوق لسكتك مريت بها عشر
كل شي تغير باب بيتك والسور لقيته حزين ومنكسر
حسيت حالي غريب والشجر هلل ودموعه تنحدر
تاخذني الذكري في يوم مريتك ناطرني بعز الظهر
تتفجر فيني كل الذكريات وسالت مني دموع القدر
عجيب كيف تتغير بلحظه وقلبك النابض أصبح صخر
ألا يا شوق بحلفك تري الروح بعدها مكسورة كسر
أمنك تجبر الروح ولا ارميني مع الذكريات وسط القبر

أجمل شي بالدنية أن يكون شخص معك كل يوم ولكن الأصعب أن تفقده بلا أسباب وبدون توضيح وبعد أن كانت صورته لا تفارقك تتلاشه ببطء








يوم ميلادك
------------------

اليوم يوم ميلادك يا عالي الرا س
يا عسي ربي يحفظك من كل الناس
أقدم قصدي هدية و وطيلك الرأس
وش مشغلك يا عنيد ويا قوي إلباس
بسامرك وبغازلك بصدق و إحساس
وبطير حواليك وبغدي طير قرناس
وان أطفيت الشمع يا عذب الأنفاس
حطني بعينك و قلبك من غير مقياس

في أي مناسبة أحب أن أكون مميز في تقديم الهدايا ومن هذا المنطلق فكرت في كتابة هذه الأبيات






شرح اشعار 2005


فوق السحاب

والله يا حبيبي طيرتني فوق السحاب
وان جيت أضمك غديت مثل السراب
يا حيف علي عشاق يصبحون أغراب
ويا حيف علي قلبين يفرقهم أعتاب
والله يا حبيبي ما يفيد هرج الأصحاب
بتبعك حتى لو يحطون بيننا أحجاب
ولك بالقلب خاطر يا سيد سيد الأحباب
وأنا اشهد إني من غرق بحبك والعذاب

كثير من الأحيان أعيش قصة حب خيالية والغريب أني أتأثر فيها وأقول معلش هذا تمرين للواقع




















مركب هواك
------------------


حبك سري بدمي وفجر عروقه
يا ويل قلبي فاض الحب بخفوقه
ركبت أنا مركب هواك وسرقته
والشعر في وسط بحر عينك نثرته
ولو خيروني بغيرك والله ما قبلته
أبيك جنبي حتى لو قليبك ما كسرته
أبيك تذكر الكدر من وجهك مسحته
وأبيك تذكر الفرح علي وجهك رسمته
وأبيك تذكر قليبي إلي بصدك جرحته
ولو الغرام رجال كان بيدي طرحته

فعلا لو الغرام رجال كان بيدي طرحته أحب أن أكون سيد الموقف في مثل ها لمواقف ويكفيني طيبة



















السنين

لا ني ناسي السنين
ولا السنين نستني
جرح بقلبي حزين
أسراره ساكنه صدري
فيني تعاسة العاشقين
وصرختي ما تعدت أذني
نقشت اسمك علي ا لجبين
كود تحس وترفق بي
حبيتك حب المجانين
فضلت نارك قبل جنتي
أهوجسبك والناس ممسين
وأنت الذي من ذبحني


في بعض الأحيان ولو نتكلم بصوت عالي ثم يعلو الصوت ويتحول إلي الصراخ الذي لن تسمعه إلا مسامع صاحب الصراخ فما الفائدة أذن















علي هونك
---------------

قرب مني علي هونك خليني أتمتع بعيونك
ضمني بديك وبأحضانك ألا ياحلوك وياحلو أحضانك
صغير السن فتنتني حتى بكلامك أبي جنتك وأبي نارك
وأبي كل من يحبك وينشد عن أخبارك
أبتبعك حتى لو تقول ويعه من خبالك
أنا ماني الوحيد إلي رجله وطت نارك
كثير مثلي ذوبتهم بحسنك وبدلالك
يالعنبو جدك ليتني الوحيد إلي عايشن بأفكارك

أقدم اعتذاري لصاحبة هذه الأبيات حيث أنها طلبت مني ذات يوم شيء لا أحب أن أوضحه وبعد فترة حسيت إني ما عندي ذوق، اعتذر بطريقتي الخاصة
























النسيان
---------------
النسيان مطلبك يا حبيبي من شهور قريبه
ما بقى من ذكراك إلا جروح بقلبي عصيبة
محبو بتي تدعي أنها بوسط قلبي غريبة
متربعة بوسط الحشى وكانت فريدة
تامر وتنهي وحنا نلبي كل ما تريده
و الجرح غزير عجز يداويه طبيبه
وعلي قولتك كل بياخذ في حياته نصيبه


























كفي
-----------
كفي جرحك الصغير الخطأ منك كبير
لملمي دموعك وخل يفيدك صاحبك الحقير
ثم ذوقي طعم الهجر بالكأس المرير
الخطا ما هو مني الخطا منك يا صغير
تشوف دمعي تحت رجلي غدا مثل الغدير
تصد عني وتطلب الفراق بمعنى مختصر
وظنك ما حسبت حساب لرجعتك يا قمر
والقلب لنكسر ما ينفع معاه حتى الجبر
عيشي حياتك مثل ما تبين وذكريني مطلع البدر

النسيان وكفي طلب كتابتهم الأخ بدر الدويسان مني وشي خاص بيننا صعب توضيحه أهديهم لبو يعقوب


















القصيدة
------------------
هذا الحب يا روحي أنتي عنوانه
والقصيد كتبته يا ناس علي شانه
والليل سهرته كله وتعشقت ألوانه
وعلي ضو الفجر تغنيت يا دان دانة
وعلي شط البحر والموج يداعب امتانه
حسدت أنا الرمل يوم تعلق بسيقانه
وحسدت أنا إلي حواليه أهله وخلانه
يا من يزرعني بقلبه حبيبي والا بستانه
يفداه العمر كله والشيب علي شانه
بس خله يقول أحبه ويدلني علي عنوانه

أهدي هذي الأبيات إلي أستاذي الشاعر بندر العتيبي الذي ولأول مرة يطلب مني قصيدة فتحياتي لبو ثامر

يسألوني

يسألوني
------------------
يسألوني عن إلي جرالي
قلت صابني سهم الحب ومحد درا بي
قالوا أوصفها بزمننا الحالي
قلت مالها وصف إلا إلي يدور ببالي
قالو تحبها ........................؟
قلت حبها ما ينطق بالفم وأصبح فوق الخيالي
قالوا وصوتها ....................؟
قلت إذا ما سمعته الله يعلم بحالي
قالو ولونها .......................؟
قلت لونها حنطي ما به بالعالم ثاني
قالوا وين أراضيها ..............؟
قلت ساكنة جدة ويريتها إقبالي
قالوا تحبك ........................؟
قلت حبها يشهد عليه قلبي وسهر الليالي


جميل أن يكون بينك وبين أي شخص عزيز مسافة والمسافات كفيلة بأن تزيد الشوق أو تبعده, وبطلة هذه القصيدة من المملكة العربية السعودية، صديقة عزيزة على قلبي، ولها دور كبير في رسم هذه الكلمة وأهديها هذه الأبيات